Vuçiqi flet në telefon direkt me serbët në Veri: Serbia është me ju

Sekretari i Përgjithshëm i presidentit të Serbisë, Nikolla Selakoviq, bashkë me shefin e zyrës për Kosovën në qeverinë serbe, Marko Gjuriq, kanë arritur në veriun e Kosovës, ku kanë takuar serbët e Kosovës.

Selakoviq tha se “edhe nëse të gjithë bindemi se është më mirë që krejt Kosova të jetë e pavarur, që ajo të mos preket dhe nuk është e rëndësishme që në Rahovec, Kaçanik e tjera vende nuk ka banorë serbë, dëshiroj ta shtrojë një pyetje: A duhet të shkojmë kësaj rruge dhe të zvogëlohemi nëpër këto troje apo duhet të mbrojmë atë që është e Serbisë”.

Selakoviq ka kritikuar patriarkun e Kishës që ditë më parë nxiti me deklarata të tij tensione për shpallje të autonomisë në veri.

“Kërkoj durimin tuaj edhe pse kjo shpesh ju ka dëshpëruar. Para 5 muajve ishim këtu të gjithë, s’mundën Marko Gjuriqit t’i bëjnë asgjë atëherë as neve s’kanë çka na bëjnë”.

“Nëse dëshirojmë ta ruajmë vendin tonë, na duhet mund dhe durim, duhet të mbani mend se sot më shumë se kurrë e keni shtetin prapa në krye me Vuçiqin në të cilin mund të besoni. Nuk duam luftë, nuk duam që ju të bini pre e provokimeve”, theksoi ai, raporton KTV.

Ndërkaq, Marko Gjuriq, tha se nuk mund ta përshkruajë çfarë përgjegjësie ndjen kur gjendet në Kosovë. “Kam ardhur sot që t’ua dërgoj që krenohem me fuqinë dhe durimin që keni toleruar mashtrimet dhe gënjeshtrat që u janë thënë këto ditë”.

“Shumë armiq tanë në ditët e sotme e di që do të dëshironin të na shihnin që jemi kundër njëri-tjetrit, por që ju nuk e keni lejuar këtë. Nuk do të merrem me ata që ju quajnë të ashtuquajtur serbë”, tha ai.

Gjuriqi tha se nuk do të lejojnë shqiptarët që të marrin veriun. “Do të jetojmë të qetë këtu. E kam një lajm që e kemi marrë nga Vuçiqi. Në veri do të realizojmë deri në fund të vitit të gjitha projektet që i kemi nisur”, tha Gjuriqi.

Në fund, ai u ka thënë serbëve të pranishëm se “e keni fjalën tonë se nuk do të keni më pak pavarësi, por më shumë, do të keni më shumë para dhe të gjitha nga Serbia”.

Tutje Gjuriqi i telefonoi presidentit serb, Aleksandar Vuçiq, gjatë kohës sa po fliste para të pranishmëve, ndërsa kreu i shtetit serb tha se “jemi shumë larg çdo zgjidhjeje për Kosovën, por do ta vazhdojmë luftën”.

“Ju e dini kush lufton për Kosovën dhe për juve. Asnjë vendim nuk do ta marrim pa ju. Në shtator do të vij që t’ju takoj dhe t’ju njoftoj për më të rejat”, tha Vuçiqi.

“Mbahuni se Serbia është me ju”, ka qenë mesazhi i Vuçiqit përmes telefoni drejtuar të pranishmëve në sallë.

Kurse, presidenti i Listës Serbe, Goran Rakiq, ka thënë se ky është një “moment historik”, sepse Kosovës i nevojitet paqja, prosperiteti dhe siguria për gjeneratat që vijnë.

Ai shtoi se çështja e Kosovës është çështje e tërë popullit serb dhe theksoi se deri më tani nuk kanë pasur kujt t’u drejtohen në Beograd.

“Për këtë arsye tani porosisim presidentin e Serbisë, Aleksandar Vuçiq, se Lista Serbe dhe populli serb në Kosovë e Metohi kanë shumë besim në të”, tha Rakiqi, dhe u bëri thirrje presidentit serb që të vazhdojë luftën për të ardhme më të mirë për serbët “në krahinën jugore” sikurse edhe në të gjitha pjesët e botës ku jetojnë serbë.

Loading...